७०औँ परिसंवाद कार्यक्रम सम्पन्न

काठमाडौँ  २चैत्र २०८०  

प्रगतिशील लेखक सङ्घले नियमित रूपमा सञ्चालन गर्दै आएको परिसंवाद कार्यक्रमको ७०औँ भाग, चैत्र २ गते सम्पन्न भएको छ । क.पुष्पलालको दार्शनिक योगदान विषयक कार्यक्रमको विषयवस्तु प्रस्तोता पुष्पलाल अध्ययन समाजका अध्यक्ष लोककृष्ण भट्टराई थिए । 

सङ्घको बागबजारस्थित कार्यालयमा भएको कार्यक्रममा आफ्नो धारणा राख्दै प्रस्तोता भट्टराईले ‘क.पुष्पलालमा रहेको द्वन्द्वात्मक भौतिकवादी विश्व दृष्टिकोणका कारण उनले नयाँ जनवादी कार्यक्रम, बुद्धिजीवीलाई निर्देशन, समाजवादको व्याख्या, मूल बाटो जस्ता विषयवस्तु हरूमा प्रस्ट रूपमा अगाडि बढेको’ बताए । उनले भने, ‘क.पुष्पलालले पहिलो पटक कम्युनिस्ट पार्टीको घोषणापत्रलाई नेपालीमा अनुवाद गरेर देशमा कम्युनिस्ट आन्दोलनलाई थप ऊर्जा दिन महत्त्वपूर्ण भूमिका निर्वाह गरे ।’ 

पुष्पलाल जन्म शताब्दी २०८१को सन्दर्भ पारेर आयोजित परिसंवाद कार्यक्रममा पूरक टिप्पणी गर्दै दार्शनिक व्यक्तित्व गोपिरमण उपाध्यायले ‘क.पुष्पलालले इतिहासलाई नयाँ रूपमा व्याख्या गर्न, नेपाली समाजको वर्ग विश्लेषण, जनवादी संस्कृतिको कार्यक्रम लगायतका विषयमा सैद्धान्तिक तथा व्यवहारिक विषयमा महत्त्वपूर्ण भूमिका गरेको’ बताए । उनले भने ‘क.पुष्पलालका अनुसार वेद, पुराणजस्ता ग्रन्थहरूमा पनि वर्ग सङ्घर्ष हुन्छ, त्यहाँभित्र अध्यात्मवादी दर्शनका साथै भौतिकवादी दर्शन पनि रहेको छ ।’ 

प्रलेसका अध्यक्ष डा.मधुसूदन गिरीको अध्यक्षतामा भएको परिसंवाद कार्यक्रमको सहजीकरण कार्यक्रमका संयोजक समीर सिंहले गरेका थिए । कार्यक्रममा टिप्पणी गर्नेहरूमा डा.हरि सिलवाल, कृष्ण सुवेदी, भक्ति लामिछाने, डा.बालाकृष्ण अधिकारी, शेखर अर्याल, यादव उपाध्याय, समीर सिंह, मातृका पोखरेल, डा.देवकला भण्डारी, केशू कार्की लगायतका थिए ।  

000

www.gyaanghar.com बाट साभार 

देवकोटा लुसुन प्रज्ञा पुरस्कार प्रा.डा. चुडामणि बन्धुलाई

काठमाडौँको अनामनगरस्थित सामाजिक विकासको सभाहलमा वि. सं. २०८० फागुन ७ गते देवकोटा लुसुन प्रज्ञा पुरस्कार प्रा.डा. चुडामणि बन्धुलाई समर्पण गरिएको छ ।

नेपालका महाकवि लक्ष्मीप्रसाद देवकोटा र चीनका महान् साहित्यकार लुसुनको सम्मानमा स्थापित देवकोटा लुसुन प्रज्ञा प्रतिष्ठान नेपालले दुबै साहित्यकारको नाममा देवकोटा लुसुन प्रज्ञा पुरस्कारको स्थापना गरी हरेक वर्ष भाषा साहित्यमा महत्वपूर्ण भूमिका निर्वाह गर्ने एकजनालाई पुरस्कृत गर्दै आएको छ ।

यसभन्दा अगाडि देवकोटा लुसुन प्रज्ञा पुरस्कारबाट वरिष्ठ साहित्यकार शान्तदास मानन्धर र सिक्किमका साहित्यकार मोहन दु्खुनलाई पुरस्कृत गरिएको थियो । पचास हजार राशि सम्मानपत्र सहितको उक्त पुरस्कार प्रम्ख अतिथि नेपाल प्रज्ञा प्रतिष्ठानका कुलपति भुपाल राई र देवकोटा लुसुन प्रज्ञा प्रतिष्ठानका अध्यक्ष सुनीलकुमार पौड्यालले समर्पण गर्नुभएको थियो ।

नेपाली भाषा साहित्यमा विशेष योगदान पुर्‍याउनु हुने चुडामणि बन्धुलाई पुरस्कृत गर्नु पाएकोमा संस्थाका उपाध्यक्ष एंव पुरस्कार छनोट समितिका संयोजक मातृका पोखरेलले गौरवान्दित भएको बताउनु भएको थियो । स्वागत मन्तव्यको क्रममा पोखरेलले आफ्ना गुरु समेत रहनु भएका बन्धुको भाषा साहित्य र प्राध्यापन क्षेत्रमा उल्लेखनीय देन रहेको बताउनु भएको थियो ।

त्यस्तै, सम्मानित व्यक्तित्वका विषयमा बोल्नु हुँदै प्रा.डा. भरत कुमार भट्टराईले चुडामणि बन्धुको कृतित्व र व्यक्तित्वबारे चर्चा गर्नुभएको थियो । त्यस्तै अर्का वत्ता साहित्यकार समालोचक ज्ञानु पाण्डेले चुडामणि बन्धु जस्तो विशिष्ठ प्रतिभालाई सम्मान गरेर संस्था आफैमा सम्मानित भएको भन्दै पुरस्कृत बन्धुका विविध आयाममाबारे बोल्नु भएको थियो ।

पुरस्कृत चुडामणि बन्धुले देवकोटा लुसुन प्रज्ञा प्रतिष्ठानले आफूलाई सम्मान गरेकोमा खुसी व्यक्त गर्नु भएको थियो । प्रमुख अतिथि नेपाल प्रज्ञा प्रतिष्ठानका कुलपति भुपाल राईले देवकोटा लुसुन प्रज्ञा प्रतिष्ठानले चुडामणि बन्धु जस्ता भाषा साहित्य विज्ञहरूलाई पुरस्कृत गर्ने सम्मान गर्ने संस्थाले असल काम गरेको भन्नुभएको थियो ।

सुनीलकुमार पौड्यालको अध्यक्षतामा सम्पन्न भएको उक्त कार्यक्रममा करिब ६० जना लेखक साहित्यकारहरूको उपस्थिति रहेको कार्यक्रमको सहजीकरण संस्थाका महासचिव सीता शर्माले गर्नु भएको थियो ।

000

www.sahityapost.com  बाट साभार 

अन्नपूर्ण पोस्ट दैनिक, मंगलवार ८ फागुन २०८०